Urriak 21eko hauteskundeak gainean ditugu, 4 egun
besterik ez dira falta eta hautagaiak beraien azken hatsa botatzen ari dira
jada. Guztia esanda dago dagoeneko eta ezer gutxi aldatuko da hurrengo
egunetan.
Azken aurreikuspenek Eusko Alderdi Jeltzalea jotzen dute
garailetzat, EH Bilduk oso gertutik jarraitzen diolarik. EAJ-ak botoen %33,9 eskuratuko
luke, 24 eta 26 eserleku lortuz; EH Bilduk berriz 19 eta 21 eserleku artean
eskuratuko lituzke, eta bigarren indar politikoa izango litzateke Euskadin;
PSE-EE izango litzateke hirugarren indar eta 14 eta 17 eserleku artean
eskuratuko lituzke; eta talde handien artean azken postuan PP kokatuko
litzateke 11 eta 12 eserleku artean eskuratuz. 2009ko hauteskundeekin alderatuz
alderdi guztiek galtzen dituzte botoak eta eserlekuak, EH Bilduk ez ezik noski,
aurten aurkezten baita lehen aldiz Euskadiko hauteskundeetara. Labur labur
aipatuz, EAJ-ak 5 eserleku galduko lituzke, PSE-EEk 9 eta PP-k eserleku 1
galduko luke
Guztiek egin diote erreferentzia krisi ekonomikoari, batzuek
beste batzuk baino gehiago, eta independentziaren itzala ere oso presente egon
da azken hilabete honetan. Katalunian gertatu denak, Euskal Herriari berriro
ere sentimendu hori berpiztea eragin dio, lokartuta zuenari noski, eta horrek
ere kanpainan bere eragina izan du. Askorentzako azken hau abantaila izan dela
esan daiteke: EH Bilduk eta EAJ-k independentziaren eta burujabetzaren alde
egin baitute, beraien mitinetan krisi ekonomikoari presentzia txikixeagoa
emanez eta independentziaren ideia sartuz. Kontrako aldean kokatu da berriz
alderdi popularra. Raxoi garatzen ari den murrizketei pisua kentzeko balio izan
baitio independentziaren ideiak eta bere hitzaldi orotan oso presente egon da.
Honen harira, Basagoitik Donostian eskaini zuen mitinean
hauxe aipatu zuen,“Urkulluk eta Masek, EAJk eta CIUk, guztiona den Espainia desegiteko akordio bat daukate, eta bien artean zuzenduko dute
guztia, denboraren arabera”.
Horrez gain, hauteskunde hauetan elkarbizitzarako eta
ekonomiarako mehatxu eta arrisku handienak EAJ
eta Iñigo Urkullu direla gaineratu zuen buruzagi popularrak.
Bilduren lehen helburua berriz, enplegua sortzea da Laura
Mintegiren esanetan, eta horretarako beraien proposamena modelo ekonomikoa
aldatzea da.
Krisia eragin zuten “iraganeko errezetak” albo batera
utzi behar dira, eta gaur egun azpiegitura handiak egiteko erabiltzen den dirua
“jarduera ekonomikoa indartzeko eta ikerkuntzan, berrikuntzan, formazioan eta
energia berriztagarrietan inbertitzeko erabili behar da”, gaineratu du EH
Bilduko lehendakarigaiak.
PSE-EEk berriz, aldarrikapen independentistak kritikatu ditu
kanpainan zehar, eta hori ez dela irtenbidea azpimarratu du, “kontrakoa baizik,
bakoitzak bereari heltzea baita”.
Lehendakariak Mariano Raxoiren Gobernuak egindako
murrizketen inguruan azaldu duenez, “krisiari aurre egiteko beste modu batzuk
badaudela erakutsi dugu, zuhurtziaz jokatuz eta lehentasunak markatuz,
murrizketarik gabe. Murrizketarik egin ez duen erkidego bakarra gara”.
Iñigo Urkullu EAJko lehendakarigaiak kanpainan zehar argi
utzi du industria izango dela EAEko ekonomia berpizteko abiapuntua. Gainera EAJk
Urkulluren esanetan ez dio “independentziari uko egiten”.
Argi dago guztia datorren igandean, urriak 21, argituko
dela eta denbora pasa ahala ikusiko dugula emaitzak eta beraien jarrerak zein
izango diren.
Bitartean, apostuak egitea zilegi da.
Amaitu aurretik, gomendio bat, horretarako norbait banaiz
behintzat: botoa emateari ez muzin egin, hau eginez gero irabazlearen eskuetan
eroriko baita boto galdu hori.
Besterik gabe, mila esker zuen arretagatik eta ongi izan.
